[閱讀分享] Thirty Million Words

哩本書係由一個美國人工耳蝸醫生Dana寫嘅。 有2個佢經手嘅病人BB天生失聰，2個都安裝咗人工耳蝸。 Zach 同Michelle. 佢哋本身個情況都好接近，又喺差唔多嘅時間接受人工耳蝸手術，手術都好成功。 「既然醫療條件幾乎一樣，他們將來的語言能力應該都會差不多。」 幾年之後Dana跟進佢哋嘅語言情況，Zach基本上同一個正常嘅小朋友無咩分別，可以正常交談。但係Michelle 語言能力明顯落後。 點解會有咁大嘅分別？ Dana 起初以為係手術、人工耳蝸，甚至孩子本身能力嘅問題。但重新檢視之後，佢發現真正嘅差別，在於兩個孩子成長時嘅語言環境。 Zach 嘅家庭雖然同樣要面對孩子失聰，但父母有較穩定嘅家庭環境，同埋一個會經常同 Zach 傾計嘅姐姐。佢哋會將日常生活變成對話，例如換衫、食飯、散步嘅時候，佢哋都會不停描述眼前發生嘅事，回應 Zach 每一個眼神、表情同聲音，慢慢建立起大量「你一句、我一句」嘅交流。 相反，Michelle 嘅家庭就面對更多現實困難。Michelle 遺傳咗爸爸嘅 Waardenburg syndrome（瓦登伯格症候群），爸爸本身亦有聽障。媽媽 Laura 好愛個女，但家庭一直受到經濟壓力同生活困擾，需要同時處理工作、照顧家庭等問題，甚至一段時間搬離原居地。喺長期壓力之下，每日更多時候只能處理眼前最急切嘅事情，好難停低同小朋友慢慢傾計、回應孩子每一個細微反應。久而久之Michelle 無一個良好嘅語境去發展佢嘅語言能力。 Thirty Million Word, 係解做由0至4歲，我哋家長有冇同小朋友傾過thirty million嘅字？不過佢之後解釋數目只係一個象徵，重要嘅係我哋有冇同小朋友有質素噉傾計？講嘢嘅時候有冇望住佢哋？有冇用positive 嘅字眼去交談？有冇不斷同佢哋講唔同嘅嘢？ 哩度引伸到書入面另一個討論位，「Iceberg Effect（冰山效應）」。 好多家長都會諗：「如果小朋友細個落後咗，之後努力補返得唔得？」 作者嘅答案係：可以進步，但要追返前面嘅差距，會愈來愈困難。 因為語言能力唔係一項獨立技能，而係一層一層累積出嚟嘅。 孩子學識一個字，先可以理解一句說話；理解一句說話，先可以學識一個概念；有咗更多詞彙，閱讀、思考同學習能力又會再提升。每一層能力，都建立喺前一層之上。 所以，早期建立起嘅語言基礎，就好似冰山水底下嗰一大部分。平時我哋只會見到孩子識講幾多嘢、閱讀能力有幾好，但其實背後係無數次親子互動慢慢累積出嚟嘅成果。 相反，如果孩子喺早期缺乏足夠嘅語言互動，之後即使開始接受更多教育，由於基礎較弱，學習新詞彙、理解故事、閱讀同吸收新知識都會變得更加吃力，差距亦可能隨住時間愈拉愈大。 呢個亦係作者一直強調點解「頭三年」咁重要。並唔係過咗三歲就冇得救，而係早期建立好基礎，之後每一步學習都會變得更加容易；相反，如果錯過咗最容易建立語言能力嘅階段，之後就需要花更多努力先追得返。 本書我冇睇晒，不過我覺得小朋友頭幾年作為家長真係要將重心放喺佢哋度，早期發展真係奠定到之後好多嘢。佢哋真係大得好快，你想等一陣先做，等等下佢哋就大個晒根本就唔想做。 --- 我本身鍾意睇書去了解哩啲嘢，因為我覺得書講嘅嘢會比較深入同系統性啲。相對要點樣點樣做，我比較鍾意知道點樣要咁樣做。 （而我通常係喺佢哋飲奶/自己玩嘅時候睇嘅） 之後可以陸續分享下其他書嘅心得。